बालपणा तू ये ना … अंन जगलेले ते क्षण पुन्हा उरी भरू दे ना …

बालपणा तू ये ना … 
अंन जगलेले ते क्षण पुन्हा उरी भरू दे ना … 

बालपणा… आठवतंय!
तू रडू रडू डोळ्यांना,
हसण्याचा आनंद दिला,
तू धडधड धडधड श्वासांना, 
नात्याचा मुका दिला, 
तू लटपट लटपट पावलांना,
बाबाचा हाथ दिला, 
अंन बोबड्या बोबड्या ओठांना,
आई हा शब्द दिला…

बालपणा तू ये ना …
अंन जगलेले ते क्षण पुन्हा उरी भरू दे ना …

बालपणा… आठवतंय!
मुळू मुळू रुसणारी, ऐकताच घंटा शाळेची,
अन खुदकन नाचणारी, ऐकताच घंटा खेळाची,
अर्ध्या तासाच्या डावासाठी, दिवसभर जगणारी,
हरलेच कधी चुकून तर झोपताच विसरणारी,
अंन दिवाळीच्या सुटीत फक्त क्रिकेट खेळणारी…

बालपणा तू ये ना …
अंन जगलेले ते क्षण पुन्हा उरी भरू दे ना …

बालपणा… आठवतंय!
आला चारमाहीचा निकाल,
म्हणून मायेचा पदर शोधणारी ,
मित्र पाचवा आला पण मी तिसरा,
म्हणून बाबांचा मार चुकवणारी,
अंन भेटताच आम्ही दोघे संध्याकाळी,
दुसऱ्याच्या गालावरची बोटे मोजणारी …

बालपणा तू ये ना …
अंन जगलेले ते क्षण पुन्हा उरी भरू दे ना …

बालपणा… आठवतंय!
असंच एकट नदी काठी रमण,
असंच एकट पावसात चिंब होण,
असंच एकट मनसोक्त गुनगुनन,
अन असंच एकट देवळात माथं टेकवण …

ना कमावल्याचा आनंद ना गमवाल्याच दुख्ख ,
ना भविष्याची चिंता ना भूतकाळाच ओझं,
ना हसण्याची ओढ ना रडण्याची भीती,
ना अस्तित्वाची जाणीव अंन ना नसल्याची उणीव …

बालपणा तू ये ना …
अंन जगलेले ते क्षण पुन्हा उरी भरू दे ना …

बालपणा …
जायचेच होते तुला तर तू आलास का?
साचणारचं होत डबक तर तू झरा दाखवलास का?
मोडायचाच होता तुला डाव तर तू मांडलास का?
अंन फक्त आठवणीतच रहायचं होत तर तू आयुष्यात आलास का …

तरीही!
बालपणा तू ये ना …
अंन जगलेले ते क्षण पुन्हा उरी भरू दे ना …